خلصت إمبارح كورس Rec 2 واللي كان تاني كورس ليا في منظمة GUE بعد كورس ال Fundamentals. الكورس كان مفيد جدا بالنسبالي وساعدني إني أحسن من مستوايا تحت الماية وكمان غير في طريقة تفكيري و غيرلي في بعض المفاهيم اللي كانت عندي واللي كانت محتاجة تطور أو تتغير.

أنا ليه عملت الكورس ده أصلا؟

أنا دخلت الكورس علشان في جزأ منه بيتكلم عن ال Navigation ( إنك تعرف الطريق تحت الماية بطرق مختلفة) والحاجة التانية هي ال Rescue أو الإنقاذ، الحاجتين دول المفروض إننا مدرب فيهم وبشرحهم للناس بس كنت شايف إني لو عملت كورس فيهم ده هيطور من المهارات بتاعتي وهيزود المعلومات اللي عندي وهيخليني كمان قادر أوصل المعلومة بعد كده بشكل أبسط وأسهل.

دي ببساطة كانت كل توقعاتي من الكورس إني أتعلم ال Navigation وال Rescue. لكن بعد ما خلصت الكورس الموضوع اختلف تمام بالنسبالي والاستفادة ماكنتش مقتصرة بس على الحاجتين اللي أنا داخل علشانهم الكورس. أنا أستفدت بشكل كبير جدا ومتوقع إن إن اللي اتعلمته في الكورس ده هيفرق معايا بعد كده في طريقة شرحي وتوصيلي للمعلومة برة أو تحت الماية.

إيه اللي استفدته من الكورس؟

1 – ال Equipment اللي استخدمتها أغلبها كانت جديدة عليا.

– زي مثلا إني أنزل ب Double Tank أنا كنت متعود أنزل ب Single Tank… موضوع ال Double ماكانش صعب أوي وده لأني كان عندي أساس كويس من كورس ال Fundamentals واللي ساعدني إني اقدر بسهولة أتنقل على ال Double واعرف أتعامل معاه.

– كمان استخدمت ال Reel في الNavigation ودي كانت حاجة جديدة تماما عليا – ال Reel دي ببساطة بكرة وملفوف عليها خيط 😀 – ودي ممكن تستخدمها لو انت بتغطس على wreck – مركب غرقانه – أو بتغطس في كهف، بتكون أحد الوسائل اللي بتستخدمها في إنك تعرف الطريق تحت الماية. وحتى لو أنا مش هغطس على مركب غرقانه أو في هكهف فالطريقة نفسها ممكن أتكلم عنها في الكورسات اللي بدرسها هتكون ميزة ليا إني أقدم للشخص طرق مختلفة وهتفتحله الطريق لإنه ممكن يجرب حاجات جديدة.

– ال canister light ده ببساطة كشاف بس مختلف شوية هو عبارة عن 3 أجزاء، جزأ منه الخاص بالبطارية وبتكون بطارية موجودة داخل حاجة زي علبة وبتبقى متعلقة في جنبنا ومن البطارية دي خارج سلك والسلك ده واصل بالجزأ الأخير اللي هو بيخرج منه الضوء…. بردو استخدام ال Canister كان جديد عليا بس كان ممتع جدا وخصوصا في ال Night Dive لأن النور بتاعه أقوى بمراحل من الكشاف العادي، كمان في ال Communication تحت الماية بيبقى فعال.

– ال Compass – البوصلة – استخدمتها كتير قبل كده بس كان في نطاق محدود أوي، كان استخدامي ليها مقتصر على التمارين اللي كنت بعلمها للناس زي إنه إزاي يعمل خط مستقيم، يعني يتحرك من نقطة لمسافة معينه ويرجع تاني لنفس النقطة باستخدام البوصلة، وكمان يعمل مربع بردو بيبدأ من نقطة معينة ويرجعلها تاني… لكن عمري ماستخدمتها في موقف حقيقي إننا أعرف عن طريقها الاتجاهات تحت الماية… الكورس ده بقى هيعلمك إزاي تستخدمها بشكل أكثر فاعلية وإزاي لو إنت في مكان ماتعرفهوش تقدر من خلالها تعرف الإتجاهات تحت الماية.

– استخدام ال SMB ودي حاجة بنملاها هواء في آخر الغطسة بتاعتنا واحنا تحت الماية وهي بتبدأ تطلع على السطح وبتكون واصلة بحبل أو خيط بيكون في إيدينا، ال SMB دي أي حد بيشوفها بيعرف إن في غطاسين في المكان ده ولو بنغطس من على مركب، الناس اللي عالمركب سهل يحددوا المكان بتاعنا لما يشوفوها وبالتالي يخرجونا من الماية… بردو ماستخدمتهاش كتير في موقف حقيقي بس في الكورس استخدمتها كتير جدا وبقيت مرتاح كمان وانا بستخدمها.

2 – الغازات.أنا أول ما بدأت غطس كنت بستخدم هواء، الهواء ده اللي هو 21% أكسجين و78% نيتروجين والباقي شوية غازات تانية، وده الهواء اللي احنا بنتنفسه عادي برة الماية… حاليا أغلب الغطسات بتنفس نيتروكس اللي هو أكسجين ونيتروجين بردو بس نسبة الأكسجين بتبقى أكتر شوية وبالتالي نسبة النيتروجين بتقل واللي بيترتب عليه إن الغطسة بتكون أكثر أمانا لأن النيتروجين مع الضغط اللي بنتعرضلة تحت الماية بياخد وقت على ما يخرج من الجسم لأن الجسم مش بيستخدمه هو بيدخل وبيخرج فمع الضغط ده ممكن يسبب مشاكل للجسم. فرق شاسع بين استخدام الهواء العادي واستخدام النيتروكس وحسيت الفرق ده مع الغطسات الطويلة، إحنا في الكورس كل الغطسات بتاعتنا كانت نيتروكس و أقل غطسة كانت 70 دقيقة تقريبا وفي غطسة قعدنا 125 دقيقة، بعد الغطسات دي أنا مكنتش بحس بتعب زي اللي كنت بحسة وأنا بغطس بهواء.

– الهيليوم : آخر يوم غطست ب Triox كان عبارة عن 30 % أكسجين و 30 % هيليوم طبعا الكتاب كان متكلم عن فوايد كتير للهيليوم ولكن نسي أهم فايدة ليه وهو إنه بيغير الصوت وبيبقى الموضوع مضحك جدا الحقيقة 😀 الهيليوم مفيد في الغطسات اللي بتكون في جو برد، أو غطسات محتاجة تركيز لو هتعمل مثل مهمة معينه تحت الماية ومحتاج تفكر وتفضل مركز في اللي انت بتعملة…. دي كانت أول مرة ليا أغطس بهيليوم وفعلا إحساسة مختلف جدا على ال 30 متر من حيث التركيز أو من حيث السهولة في تنفسه على عكس الغازات التانية.

– الكورس كان فيه جزأ لل Navigation و Night Dive و Rescue و ال Triox كلهم كان فيهم حاجات جديدة تماما عليا واستفدت منهم، وحاجة مهمة بقى استفدتها من الكورس وهي إني لما أعمل كورس محتاج أعمله مع حد يكون عنده خبرة في الماية بعيد عن التدريس، يعني حد يكون غطس في أماكن مختلفة وقابل تحديات مختلفة فأغلب الحاجات اللي بيشرحها ليك هتكون منطقية لما يديك مثال من المواقف اللي قابلها تحت الماية.

– كمان التخطيط للغطسة ده كان حاجة مهمة اتعلمتها، التخطيط لكل حاجة من البداية للنهاية سواء تخطيط للمعدات اللي هنستخدمها، أو اللي هنعمله في الماية وكمان خروجنا من الماية هيكون ازاي والتواصل مع بعض ك Team.

آخر حاجة حابب أتكلم عنها في الاستفادة من الكورس وهي ال Capacity. في بداية الكورس أنا كنت نازل بحاجات كتير وأغلبها كان جديد عليا فكانت ال Capacity بتاعتي قليلة وكان في صعوبة بالنسبالي إني أقدر أتعامل مع كل ده، لكن مع الاستخدام والتكرار والتوجيه مابقاش عندي أي مشكلة مع كل الحاجات اللي أنا شايلها، بقيت أعرف أوصلها بسهولة، بقيت أتعامل مع ال Equipment وأنا بتواصل مع ال Team أو وأنا بتحرك فالCapacity بتاعتي بقت أعلى بكتير وبقيت قادر أستوعب كل الحاجات اللي أنا ماشي بيها.

– الكورس ده مينفعش إنك تدخل عليه على طول يعني لو إنت مش Diver أصلا فمحتاج الأول تعمل الكورس اللي قبليه اللي هو REC 1 ولو حد بيغطس زي حالاتي فا هيحتاج يعمل ال Fundamentals Course الأول واللي كنت اتكلمت عنه هنا ahmmdfadel.com/2019/03/22/why-gue/

error: Content is protected !!