واحنا بنغطس هنلاحظ إن في بعض الشعاب المرجانية لونها أبيض على الرغم من إن ممكن يكون حواليها شعاب مرجانية من نفس النوع ولكن لونها مختلف، تفتكرا ده ليه بيحصل؟

اللون الأبيض ده عبارة عن حالة بتحصل للشعاب المرجانية إسمها coral bleaching – ابيضاض المرجان – وده بيحصل بسبب التلوث، التعرض المباشر للشمس وارتفاع درجة حرارة الماية، وانخفاض منسوب المياة بشكل شديد واللي بيأدي إن الشعاب الموجودة بالقرب من الشاطئ إنها تتعرض للهواء وبالتالي يحصلها bleaching واللي بيأدي لموتها بعد كده.

إيه طيب اللي بيحصل بيخلي لون الشعب يتغير؟

على الشعاب المرجانية بتعيش حاجة إسمها Algae zooxanthellae – طحالب – وال Algae تعتبر هي المصدر الأساسي اللي بتعتمد عليه الشعاب المرجانية في الغذاء وهي كمان اللي بتديها اللون. يجي واحد هنا ويقولي إيه ده هي الشعب المرجانية بتاكل؟ أنا مش هرد عليك.

لما بيحصل تغير لدرجة الحرارة الشعاب المرجانية بتفقد ال Algae وبكدة بتفقد أهم مصدر للغذاء ويبدأ لونها يتحول للأبيض وبتكون أكثر عرضة للأمراض. نفس الواحد اللي سئل فوق هيسئلني تاني هي الشعاب بتمرض؟ بردو مش هرد عليك. http://bit.ly/2JlyETe

هل إحنا كبشر ممكن نساعد في التقليل من الضرر اللي بيحصل للشعاب المرجانية؟ أيوه نقدر نعمل ده عن طريق الآتي: http://bit.ly/2J5xaNy
1 – مانرميش الزبالة في البحر أو نسيبها على الشواطئ. 

2 – نعرف أكتر عن الشعاب المرجانية ولو رايحين مكان في شعاب مرجانية نسئل المتخصيين ونفهم منهم إزاي نتعامل مع الشعاب المرجانية علشان مانسببش ضرر ليها. 

3 – لو تقدر تشارك في Cleanup Dive – دي غطسة علشان ننضف الزبالة الموجودة تحت الماية – ولو مش هتقدر في حاجة تانية بتتعمل وهي تنضيف الزبالة الموجودة على الشواطئ. 

4 – إعادة استخدام الأشياء -Recycle- يعني لو في عندنا حاجة نقدر نستخدمها مرة تانية بلاش نرميها. 

6 – لو هناكل سمك يكون عندنا وعي بالسمك اللي احنا بناكله في الأماكن اللي فيها شعاب مرجانية مهم نكون عارفين مصدر السمك ونعرف هل عادي مسموح صيد السمك في المكان ده ولالا، ولو لا إيه الأسماك اللي مفروض مانكلهاش لأنها بيتم اصطيادها بطرق غير شرعية وبالتالي اصطيادها بيأدي لضرر الشعاب المرجانية، وهنعرف كل ده ازاي؟ ده هيكون موضوع حلقتنا الجاية.

ملحوظة: الابيضاض في منه كذا نوع، واحد منهم اللي انا اتكلمت عنه وده ضار وفي نوع تاني وهو ابيضاض النمو.

مراجعة البوست وتصحيح المعلومات Abd El Rahman Elmekkawi

Leave a Reply

Your email address will not be published. Required fields are marked *

error: Content is protected !!