دهب تعتبر واحدة من أفضل أماكن الغوص على مستوى العالم، عندنا تنوع في مواقع الغوص المناسبة لكل المستويات وكمان بتتميز مواقع الغوص بتنوع الكائنات البحرية، بالإضافة للتنوع في الشعاب المرجانية من حيث اختلاف الأشكال، الألوان وكمان الأنواع. مؤخرا بدأت الحياة البحرية تتدهور و تتأثر بالسلب، الشعاب المرجانية بتموت، كمان الأسماك بتقل بشكل ملحوظ وده نظرا للتعامل مع الحياة البحرية باستهتار وإهمال.

العوامل اللي بتدمر الحياة البحرية كتير، في منها اللي نقدر نمنعه ونتحكم فيه وفي عوامل تانية هيكون صعب إننا نتحكم فيها.

وواحد من أهم العوامل اللي نقدر نتحكم فيها، هي الصيد الجائر للأسماك، تعتبر دهب محمية طبيعية يعني ماينفعش انك تصطاد فيها، طبعا إنت هتقولي أنا مش بصطاد، أيوه انت مش بتصطاد ولكن بتساعد الناس اللي بيصطادوا إنهم يكملوا في اللي هما بيعملوه ويدمروا الحياة البحرية… بتساعدهم عن طريق أكل الأسماك اللي هما بيصطادوها واللي صيدها بيدمر البيئة.

طيب إيه اللي هيضر البيئة إننا نصطاد الأسماك دي؟؟؟؟

أولا في بعض الأسماك اللي بيتم اصطيادها بتعتمد في غذائها على الطحالب اللي بتنمو على الشعاب المرجانية، الطحالب دي بتأذي الشعاب وبتموتها وعلشان كده مهم إن الأسماك تتغذى على الطحالب باستمرار وإلا الطحالب هتنمو على الشعاب المرجانية وهتدمرها.

لما الشعاب المرجانية ماتكونش موجودة إحنا كده بنفقد العامل الأهم اللي الناس بتيجي دهب علشانه وهو إنهم يستمتعوا بجمال الطبيعة اللي تحت الماية. كمان الأسماك اللي بيتم اصطيادها مع الوقت هتنتهي ومش هيكون في أسماك نتفرج عليها يعني باختصار المكان اتدمر. ده مقال كنت كاتبة عن أهمية الشعاب المرجانية اللي حابب يبص عليه. http://bit.ly/2W8F7Eb


ثانيا في أسماك زي Grouper مثلا تعتبر Top Predtor يعني على قمة الهرم الغذائي ولما يتم اصطيادها بيحصل Overgrowth -نمو أو زيادة بشكل مفرط- للأسماك اللي ال Top Predtor بيتغذى عليها وبالتالي الزيادة دي بتأدي لخلل في النظام البيئي.

إحنا كأشخاص عاديين ممكن نعمل إيه علشان نتغلب على المشكلة دي؟

ببساطة يكون عندنا وعي بنوعية الأسماك اللي بناكلها ونبعد عن الأسماك اللي بدأت تقل بشكل ملحوظ واللي صيدها بيأدي لتدمير الحياة البحرية… لو انت في أي مطعم تقدر تسئل على نوعية السمك اللي انت بتاكله وتقدر كمان تشوف السمك قبل ما يتعمل، مش هقولك اسئل في المطعم السمك بيتم اصطياده منين علشان محدش هيقولك إحنا بنصطاده من دهب. إنك تبعد عن الأسماك دي في رأيي المطاعم غصب عنها مش هتقدم النوعية دي من الأسماك، أو هيقدمها بإسم تاني 😀 بس احنا بنعمل اللي علينا، وده ممكن يقلل من صيد الأسماك المهمة للشعاب المرجانية وللحياة البحرية. ولو مهتمين تعرفوا أكتر عن طرق نقدر بيها نحافظ على الشعاب المرجانية اقرأوا المقالة دي. ahmmdfadel.com/2019/05/07/coral-bleaching

دي أسماء الأسماك اللي قلت بشكل ملحوظ وبالتالي البيئة اتأثرت بالسلب لعدم وجودها وتحت صور الأسماك .

parrotfish حريد

 Grouper ناجل – هامور – شريفة – كوشر – تاوينة

surgeonfish

rabbitfish

damselfish

مراجعة البوست وتصحيح المعلومات Abd El Rahman Elmekkawi ❤️


error: Content is protected !!