أول ما بدأت الغوص كنت دايما بحب أتفرج على فيديوهات عن الKicks وأنواعها المختلفة وإزاي أقدر أعمل كل واحدة فيهم، وكنت بحب أتفرج على فيديوهات لناس بتعوم واتفرج على شكلهم في الماية عامل ازاي ولفت نظري في الفيديوهات حاجها إسمها GUE الكلمة دي كانت دايما بتتكرر وتظهر قصادي وانا معرفش إيه ده كل اللي أعرفه إني لما بشوف الكلمة دي مباشرة أعرف إن في حد Professional هيبقى ظاهر في الفيديو حتى من قبل ما أتفرج على الفيديو كان ده اللي بيجي في بالي من كتر مانا شوفتلهم فيديوهات وكنت دايما مبهور بشكلهم في الماية من خلال ال Demonstration اللي بيعملوه في الفيديوهات.

وتدور الأيام واعرف إن دي منطمة غوص إسمها GUE والتلات حروف دول اختصار Global Underwater Explorersوطبعا الانطباع اللي كنت واخده عنهم من قبل ما أصلا أعرف إيه ده اتأكدلي بعد ماعرفت إن دي منظمة للغوص. اتأكدلي إن الناس دي فعلا مختلفين وبيقدموا حاجة مختلفة. كل اللي انا بتكلم فيه ده حصل من غير أي احتكاك بيهم أنا كل علاقتي بالمنظمة كانت شوية فيديوهات بتفرج عليها وشوية معلومات بدأت أجمعهم عن المنظمة وبيعملوا إيه.

وفي شهر سبتمبر اللي فات بدأت أول كورس ليا مع ال GUE وكان كورس GUE Fundamentals، الكورس ده أنا عملته وأنا مدرب وكنت اشتغلت تقريبا سنه ويمكن أكتر في التدريب ودي كانت نقطة مهمة جدا لأني كنت واخد انطباع معين عن نفسي وبعد الكورس الانطباع اختلف تماما.

الكورس ده غير طريقة تفكيري 180 درجة، تقريبا ده أكتر كورس استفدت فيه في الغوص، شكلي في الماية بقى مختلف، الطريقة اللي بعمل بيها كورسات أو بشرح بيها للناس اختلفت، المعلومات اللي عندي زادت واتطورت ودماغي اترتبت أكتر. ده مش معناه اني ماستفدتش من الكورسات اللي قبل كده،استفدت طبعا ولكن الكورس ده كان مختلف.

الحاجات اللي اتعلمتها في الكورس لما بدأت أطبقها مع الناس اللي بتتعلم غوص معايا فرقت جدا معاهم في مستواهم في الماية. مش بس مع الناس اللي أول مرة يتعلموا غوص، كمان لما بنزل مع حد هو أصلا معاه رخصة وببدأ أقوله على شوية ملاحظات علشان يقدر يتحسن في الماية ويبدأ الشخص يطبق اللي أنا بقوله هو من نفسه بيجي يقولي أنا طبقت الحاجة دي وفرقت معايا، وآخرهم من كام يوم كنت بعمل Briefing لناس بتعمل كورس الAdvance وشرحتلهم فكرة ال gliding وازاي يستفيدوا من ال Kicks ويكونوا مرتاحين في الماية وإن ال gliding هيساعدهم على تقليل استهلاكهم للهواء وكان حد صاحب الناس اللي بعملهم كورس قاعد بيسمع وهو معاه رخصة ولما سمع المعلومة طبقها في الماية وبعدها بيومين الناس اللي بيعملوا معايا الكورس حكولي انه سمع المعلومه دي في ال Briefing وطبقها وفرقت جدا معاه.

الخلاصة من وجهة نظري الكورس ده هو أساس قوي جدا لأي حد سواء لسه في البداية أو حتى هو مدرب أو أيا كان مستواه. أنا برشح الكورس ده لأي حد أيا كان مستواه فعلا هتستفيد بشكل كبير، هتستفيد على المستوى الشخصي وكمان هتقدر من خلال المعلومات اللي أخدتها من الكورس إنك تفيد غيرك. اللي هتتعلمه في الكورس هو أساس هتقدر تبني عليه وهيفضل يتطور معاك طول مانت مكمل. الكورس ده هيغيرلك طريقة تفكيرك وهيلفت انتباهك لنوع وشكل تاني من الغوص ممكن انت ماتعرفش انه موجود.

وآخر حاجة بقى هي إني لازم أشكر Sameh Sokar المدرب اللي عملت معاه الكورس ده واللي لحد النهاردة بتعلم منه سواء بالنصايح اللي بيقولهالي كل شوية أو في رده على أسئلتي.

Leave a Reply

Your email address will not be published. Required fields are marked *

error: Content is protected !!