في البداية كده اللي ميعرفش الفرق ما بين الهواء والنيتروكس في الغوص الترفيهي الغاز اللي بنتنفسه بيكون خليط من الأكسجين والنيتروجين، نسبة الخليط ده ممكن تبقى 79% نيتروجين و 21% أكسجين وده بنقول عليه هواء، اللي هو الهواء العادي اللي احنا بنتنفسه برة الماية، وفي خليط تاني وهو النيتروكس وده بنزود نسبة الأكسجين لحد 40% وده في الغوص الترفيهي وهنقول ليه في الآخر بنزود الأكسجين.

لو الدقة مش واخدة حقها معاك فوت الفقرة الجاية وادخل عالفقرة اللي بعدها.

– بالنسبة للناس اللي الدقة بتبقى واخده حقها معاها فهضيف معلومة زيادة وهو إن الهواء اللي احنا بنتنفسه بيكون عبارة عن 79.09% نيتروجين + 20.95% أكسجين + .093% أراجون +.04% ثاني أكسيد الكربون وتقريبا في شوية حاجات تانية معاهم.

موقع alertdiver نشر مقال بيناقش فيه معلومة متداولة بتقول إن الغوص بالنيتروكس بيقلل إحساسك بالتعب بعد الغوص بالمقارنة بالهواء. يعني في ناس بعد مابتغوص بالنيتروكس بيحسوا إنهم أفضل من لما يغوصوا بالهواء.. فهل دي معلومة علمية صحيحة ولالا؟

على حسب المقال واللي جايب أراء بعض الدكاترة والمتخصصين في الموضوع، قالوا إن المعلومة دي غير مثبته علميا، هي ممكن تكون صح بس مفيش دليل علمي عليها أو مفيش تجربة توضح مدى صحتها.

واتكلم المقال عن التعب اللي ممكن حد يحسة بعد الغوص هو ليه أسباب كتيرة، منها أسباب متعلقة بالغوص وأسباب خارجية؛ الأسباب المتعلقة بالغوص زي الإجهاد بسبب تغير درجة الحرارة، أو بسبب تخفيف الضغط، أو الطاقة المبذولة في الغوص، وممكن التعرض للأكسجين لفترات طويلة، وأخيرا القلق أو دوار البحر… وعموما إن أجسامنا تبقى تحت الماية ده بيكون ليه تأثير على أجسامنا وبتحصلنا بعض التغيرات الفسيولوجية واللي بتأدي إننا نحس بالتعب أحيانا بعد الغوص.

أما الأسباب اللي مالهاش علاقة بالغوص فممكن تكون قلة النوم، تناول الحكول، أو ال Jet lag “اضطراب الرحلات الجوية الطويلة”-ترجمة ويكيبيديا-

بينتهي المقال بفوائد الغوص بالنيتروكس وهو ليه 3 فوائد. 

1 – بيزود ال Bottom Time يعني الوقت اللي تقدر تقعده تحت الماية هيبقى أكتر. 

2 – وتقدر تقلل الوقت اللي هتقعدة بين كل غوصة والتانية اللي هو ال Surface Interval

3 – بيقلل من الإجهاد الناتج عن تقليل الضغط. المقال في معلومات أكتر لو حد حابب يدخل هنا

Leave a Reply

Your email address will not be published. Required fields are marked *

error: Content is protected !!