إزاي تستمتع بأول تجربة غوص ؟

لو هتجرب الغطس لأول مرة في بعض المعلومات البسيطة اللي محتاج تعرفها واللي هتساعدك بشكل كبيرا إنك تستمتع بأول غطسة لأنك هتقدر تتغلب على المشكلات اللي ممكن تواجهك في الغطسة الأولى.

تلات حاجات مهمة محتاج تعرفها:

1- تأثير الضغط على جسم الإنسان.

2 – دخول ماية للماسك.

3 – دخول ماية لل Regulator أو المنظم اللي بنتنفس منه.

1 – الضغط.

أول معلومة محتاج تعرفها إن الضغط بيزيد كل ما بننزل تحت الماية وكل ما بننزل أكتر الضغط بيزيد أكتر، طيب هل ده ليه تأثير على جسم الإنسان؟

أيوه بيأثر ..الضغط بيأثر على الفراغات الهوائية الموجودة في جسم الإنسان .. الفراغات دي موجودة في الرئة، الأذن، الجيوب الأنفية، وكمان الفراغ اللي بيكون بين الوجه ونضارة الغطس “الماسك”.

إزاي نتغلب على الضغط ده؟

أول حاجة الرئة؛ التنفس يكون باستمرار وببطء-الشهيق والزفير من الفم مش من الأنف- والنفس يكون عميق بمعنى إني أملى صدري على الآخر والهواء اللي جوه صدري ده يخرج ببطئ، لو اتنفسنا بالطريقة دي الرئة مفيش تأثير عليها من الضغط.. في الأول علشان الموضوع بيكون جديد على الشخص هيلاقي إن في صعوبة في موضوع النفس لكن بعد دقايق من التجربة هيلاقي النفس ظبط معاه.

تاني حاجة الجيوب الأنفية والأذن؛ أول ما بنبدأ ننزل بنحس بالضغط في الأذن، في البداية بيكون إحساس غريب، يعني مش إحساس مؤلم ولا إحساس هيضايقك، بنحس بحاجة غريبة في الأذن، في الوقت ده بحتاج أعمل المعادلة أو Equalization.

بعملها إزاي؟

باخد نفس وبقفل الأنف بإيدي وبحاول أخرج الهواء ده من الأنف وأنا قافلها، فالهواء بيرجع تاني للأذن ويتغلب على الضغط اللي وقع عليها.. والمعادلة دي بتستمر معايا طول الغطس، كل ما بحس بالضغط بعمل المعادلة.

تالت حاجة الفراغ اللي بين الماسك والوجه؛ لو حصل إن في تأثير على الماسك وحسينا إن الماسك بينضغط على الوجه بنخرج هواء من الأنف علشان يرجع الماسك تاني لوضعه الطبيعي “وتأثير الضغط على المسك قليل لما بيحصل”

2 – دخول ماية للماسك.

وارد إن شوية ماية يدخلوا جوه الماسك ودي ليها طريقة سهلة بنخرج بيها الماية، بنرفع دماغنا شوية لفوق وبنضغط على الجزأ الأعلى من الماسك، وبنخرج الزفير من الأنف، الزفير هيخرج الماية الموجودة جوه الماسك.. يعني حتى لو الماسك كله مليان ماية بنفس الطريقه دي نقدر نخرج الماية كلها بسهولة.

3 – دخول ماية لل Regulator أو المنظم اللي بنتنفس منه.

دي ليها طريقتين؛ الطريقة الأول إني بنفخ الزفير من الفم بقوة فالماية هتخرج مع الزفير، والطريقة التانية بيكون في جزأ في المنظم بتضغط عليه هو بيخرج الماية دي عن طريق إنه بياخد شوية هواء من التانك بيدفعوا شوية الماية للخارج.

طبعا دي مش كل حاجة عن الغطس بس مبدأيا الحاجات دي لو عرفتها وطبقتها أول غطسة ليك هتكون تجربة ممتعه ومش هتنساها

Leave a Reply

Your email address will not be published. Required fields are marked *

error: Content is protected !!