قرأت خبر عن شخص اتعض من Moray EEl والعضة كانت في رقبته والحمد لله نجا منها والعضة دي كانت ممكن تتسبب في موته -الخبر في أول تعليق-ولما قرأته افتكرت الصورة اللي أنا رافعها دي لأن ليها قصة معايا. الصورة دي كانت في Um El-said في دهب، كان معايا 2 غطاسين واحد مدرب وصاحبته جايين يقضوا كام يوم في دهب، ناس كويسين في الماية وفاهمين وماكانوش متعبين خالص. شوفنا ال Moray أنا كنت ماشي في الأول وشاورتلهم علشان يقربوا وييتفرجوا، كنت أنا بصور في الأول وبعد كده رجعت شوية علشان الاتنين يتفرجوا هما قربوا شوية، خلصوا الست بدأت تتحرك وبعد كده المدرب راح مقرب أكتر وبدأ يمد إيده بين الصخور علشان يلمس ال Moray فروحت أنا عليه بسرعه علشان أبعده وفعلا سمع كلامي ومشي وكملنا الغطسة عادي بس باقي الغطسه أنا طول الوقت بفكر هو إزاي يعمل كده ده حتى مش شخص عادي ده المفروض مدرب . لما خرجنا من الماية سئلته إنت ليه عملت كده، إنت مش عارف إن ال Moray خطير وممكن يعضك وهتتأذي منه، قالي لا أنا عملت الحوار ده قبل كده وكان ملمس ال Moray حلو جدا ومعملش ليا حاجة. اتكلمت معاه إن مش معنى إنه معملش حاجة ليك في المرة اللي فاتت إن كل مرة مش هيعملك حاجة، ووضحتله خطورة ال Moray وقد إيه هو ممكن يتأذي منه.

اللي عايز أقوله إن الحيوانات اللي تحت الماية غير اللي برة ده مش كلب ولا قطة هتحسس عليه وتلعب معاه، ده كائن ليه سلوك مختلف تمام وممكن يأذيك لو قربت منه أو لمسته، وكمان إنت ممكن تأذيه لما تلمسه. المفروض إحنا لا بنلمس حاجة تحت الماية ولا بناخد حاجة معانا من الماية، بنتفرج بس.

Leave a Reply

Your email address will not be published. Required fields are marked *

error: Content is protected !!